基金檢閱 4/5/2007

尋晚轉左兩隻基金，睇到印度跌完，返返上之前個價位，估計應該仲有一段時間可以升，相對於近期疲弱既東歐似乎更加有投機價值，因此轉左東歐筆錢落印度。

另一方面，亦都見到能源基金走勢似乎唔錯，50天同100天平均線都係向上，於是決定將隻環球品牌轉左過去。

除此之外，順便講下其他基金走勢。

早排見到泰國50天移動平均升穿100天線，而家佢真係越升越有，已經沖破上年12月跌落唻既高位，返返上10蚊樓上，計計埋埋都升左10%以上(由三月初至今)，似乎用移動平均線去睇基金都幾有用。

早排新出既商品物料基金，我果時眼見佢有水泥行業係入面，出左唔夠兩日(一月尾出)就轉左入去，今日睇返，短短三四個月已經升左15%，算係近期升得比較勁既基金。

拉丁美洲雖然升左唔小，早排亦都急跌左10%，但係而家似乎已經企返穩，50天線都仲頂住冇跌穿100天線，似乎應該未洗放住。

除左以上既高風險投機基金外，仲有兩隻不敗基金係組合入面，就係Value Partners既價值基金同埋Morgen Stanley既亞洲房地產，呢兩隻基金勝在波幅夠低，都佔左組成三成，就算唻緊有咩風吹草動都應該可以頂得住。況且隻Value Partners 年初至今回報仲有成13%，真係唔講得笑！

以上只為個人分享，並非投資建議。

基金唔單止係中間人咁簡單

繼續回應：

基金唔單止係中間人咁簡單…

唔知你知唔知..基金其實有好多自己途徑可以以折讓價買入正股，你成日聽到某股票配股，配售價比收市價折讓5-10%，配售比邊個？咪大戶囉！邊個係大戶？咪基金囉！

基 金分析員唔單只資訊比我地多(例如佢地可以搵獨立會計師幫間公司再複核條數，以防做假，又可以親自同班管理層傾計，了解發展方向，又可以走去人地間廠度睇 出貨入貨量，了解操作流程。)，佢地更加可以係間公司未上市之前己經開始分析，然後以比招股價仲平既價格買入呢間公司股份(傻啦，佢地唔洗抽新股架！)， 你話呀，你就算你用招股價買入，都比佢地貴10%-20%，如果計升幅，邊有得同佢地鬥？

銀行股係穩陣，但風險太集中，太易受息口影響(就好似近排次級按揭問題，令金融股大跌，咪因為之前加息引起囉！)，不過似乎你唔係太在意風險因素，如果你淨係睇回報，咁股票同基金都差唔多..(相同回報，理性投資者會選擇波幅較低者，所以我會揀基金多過銀行股)

月供基金好定月供股票好？

係人地個xanga度睇到有人問關於月供基金同月供股票既問題。

對方認為月供股票比較好，因為同樣都可以幫你儲到一筆錢，亦可以作為中長線投資，但係唔收基金管理費，變相收費會平d，而佢亦表示唔相信基金經理眼光，覺得基金經理只係會盡力sell好隻基金。

以下係我既睇法同回應。

如果你有能力係全世界唔同國家，例如中國，印度，南韓，俄羅斯，土耳其，法國，德國，巴西度買到股票，仲有能力每月供一百隻股票(每隻最少$1000 的話每個月要十萬元)，咁無疑月供股票係好過月供基金，因為咁樣你就真係基金經理。

基金有基金好，就係好在你可以用少少錢，就分散晒係全世界買入過千隻股票，唔同類型，唔同國家，唔同市場，唔同基金公司，咁樣你面對既價格波幅(風險)就會低好多。

你唔信基金經理眼光，咁點解又會信一間公司管理層眼光？其實基金經理就好似公司管理層咁，表現唔好會比人炒。你去揀股票會睇公司過往業績，又會睇未 來前景，咁你可以用返同樣方法去揀基金，謝清海有隻惠理價值基金，表現超晒班，成立左14年，升左十三倍，平均年回報有成21%，相對其他香港基金，你都 會揀呢隻啦！情況就好似你揀匯豐而唔揀8號仔咁。

另外，唔好搞錯，你講果d基金似乎係銀行sell果d新基金，我都好反對人買新出既基金(我都唔like抽新股)，因為完全冇過去記錄可以睇，遇著 跌市時抗跌能力如何？升市時表現又如何？完全唔知。我講既基金係出左超過五年，而銀行永遠唔會推介果d基金(銀行淨係識推介新基金)。

月供一兩隻股票既成本會比月供基金平，但係，月供存款戶口既成本又會比月供股票平。有時候，唔可以淨係去睇收費，著眼點應該係溍在回報。如果你月供 一兩隻股票，而希望回報比月供基金高，咁同買大細冇分別，機會一半一半啦..如果唔相信基金經理眼光，咁點解又會相信自己眼光呢？基金經理表現唔好會比人 換走，你眼光唔好有冇人可以換？

關於二者既風險，如果風險係指”蝕錢既可能性(散戶口中講既風險)”，咁買基金同買股票差唔多，係蝕既，兩者都可能會蝕。如果風險係指”價格波幅 (投資學上講既風險)”，咁基金會比股票好，話晒基金係由過百隻股票集合而成，一隻股票既跌幅，可以由另一隻股票既升幅扺消左，相對價格波幅會低d。

45歲退休(財務自由)後每月一萬收入

睇完戲同班朋友傾開，講開自己個退休(財務自由)計劃。事緣早個幾月自己同自己個左個每月兩千蚊，供30年o既全方位退休(財務自由)方案，到55歲可以 儲到一千萬左右(預期每年回報15%)，咁呢一千萬就可以拎去買樓，如果每層兩百萬，咁就可以買五層，全部放租出去，每層收租七千(租金回報率為 4.5%)，咁大約有三萬左右退休收入，一直到百年歸老。不過，三十年後o既三萬等於而家一萬左右(預期通脹率3.8%)，所以都只係算係一個最基本o既 退休(財務自由)計劃。

另外，亦都計過，如果想45歲就退休(財務自由)的話，咁可以計計，之前個plan 照去，跟住再儲一筆錢，大約要多二百六十萬，足夠45 至55 歲o既每月一萬二千蚊支出(一萬蚊生活費，兩千蚊供基金)，咁樣只要另外額外每月再供多兩千蚊左右(預期每年回報15%)就可以儲到呢筆錢。

有人問：邊度有咁高回報呀？15%係咪一定有呢？

我答：呢個係預期回報，係根據過去三十年股票市場o既回報project 出唻，當然，過去表現唔代表將來，15%未必一定有，不過可以肯定，放係銀行度儲就一定冇囉！

而 家問題唔係有冇15%，而係點樣先可以有15%，你放銀行一定唔得，全部買債券都唔得，唯有投資係股票或股票基金先有可能。我話，你識投資，識揀股，又有 時間睇住個股市，亦都有信心拎住一百萬可以一年賺十五萬(通常呢，拎住一萬賺千五容易，但拎住十萬賺萬五就難)，咁就自己買股票，否則就買基金，交比基金 經理幫你搞。

又有人問：我一萬蚊退休唔夠洗喎，我估要兩萬先得！我答：我夠嘛..現時，你唔夠洗，咁就要儲四千蚊一個月先得啦！

第二個朋友問：四千蚊？我先搵得果萬幾，點可能儲到四千？我答：我叫佢儲四千咋嘛，你搵萬幾，咁退休想洗幾多？一萬蚊夠未？夠咪每月儲二千囉！(等加左人工先再諗45歲退休啦！)

第 三個朋友問：三十年後，d 樓仲點止兩百萬一層呀？我答：我係話，如果兩百萬一層，買五層，咁如果三百萬一層，咁咪買三層囉，總之有三萬蚊租金收入就夠。呀，我仲未諗可能退左休後層 樓會升值先呀！又或者，退休後唔想麻煩去打理幾層樓，走去買領匯基金都得，每年都有6%息收下，都幾好。

仲有其他問題，不能盡錄，都唔明，我退休o者，反而佢地有咁多問題，或者，其實大家都係度諗緊呢d 相類似o既野....

如何利用Smart Mortgage 增加回報

Lunch 同同事傾開，個客有層樓，仲差四年供完，約欠四十萬，而家供緊九千蚊一個月，佢打算再按七十萬，咁想問我，點樣用Smart Mortgage 幫佢賺錢。

我建議，如果依現時情況，佢四年後可以供甩層樓，跟住再每月用九千蚊做投資，做十六年，假設每年回報為14%，咁佢廿年後可以有一層樓同埋大約六百萬資金。

而， 如果用Smart Mortgage ，按七十萬出唻，四十萬還左現有Mortgage，仲有三十萬做一筆過投資，另外果七十萬按揭就每月還五千(設按揭利率每年7%)，二十年可以還完，咁仲 有每月四千蚊可以拎去做投資，為期二十年。如是者，假設每年回報14%，到二十年後可以有一層樓同埋大約一千萬資金。

以上兩個情況，佢都係唻緊二十年每月比九千蚊，二十年後大家都有一層樓係手，而前者只得六百萬，後者則有一千萬，足足多四百萬。風險方面，後者投資期為二十年，前者則為十六年，故後者風險相對較低(同為14% 回報)。

相同資源，更低風險，相同回報假設，可以爭取更豐厚回報，此為財務策劃之精神也！

基金的平與貴

今日同朋友傾開新發行的幾隻基金，朋友問，某中國基金己經發行左十幾年，而家已經六十幾七十蚊，相對另一隻中國基金，而家只係十蚊，咁會唔會我買新基金比較好呢(因為比較平)？

其實，基金o既價格係冇乜意思，只係一個數字，要比較唔同基金係唔可以以佢o既價格去比較，其中一個理由係唔同基金係發行時o既價格可以唔同，有時有d 係 $10 一個單位，但另一隻就係 $100 一個單位，咁你唔可以話 $100 果隻比 $10 果隻貴。

另一方面，唔同基金發行o既時間唔同，發行得耐o既基金每單位價格當然比新發行基金為高。但係想深一層，假設兩隻基金o既組合分佈一樣，咁你放錢入 去呢兩隻基金度，佢入面都係間接放左落相同股票上面(於相同股價買入)，而一年後，如果呢 d 股票升值 30%，咁無論你買邊一隻基金，都會同樣有 30% o既回報(未計及基金管理費)。

不過，相比新發行基金，發行左十幾年o既舊基金有個好處係佢有往績可尋，你可以睇返呢隻基金個基金經理係過去不同時段o既表現，尤其係佢係跌市時損失係咪比大市為低，甚或逆市上升。雖然話過去表現唔代表將來，將 d 錢放入不過一檔過去表現好o既基金始終令人較為放心。

咁係咪唔好買新基金呢？其實投資同買馬唔同，你唔係要估中邊隻基金跑第一先有錢賺，就算你買落隻舊基金度，但最後新基金回報比舊o既更好，你隻舊基金都一樣係幫你賺左唔少錢。甚至，你可以兩隻都買，八成呢隻兩成果隻，咁就更加唔洗擔心。

不過，話時話，中國市場都升左唔少，如果淨係買落中國度未免風險太集中，都係分散 d 落其他國家、其他類別o既基金會好 d 。

由$3200到一億！

今日買左林少楊本書，”由3200元開始，步上一億元財富之道”，自己之前都有睇開am730，有留意佢個專欄，都幾同意佢講o既野，其後先知原來佢係亞洲股神Tony o既徒弟，果然有料到！

講返本書，究竟點樣可以由三千二蚊變成一億呢？原來好簡單，只要你每月有三千二蚊可以剩低，跟住你仲有四十年時間，又搵到個投資項目比到你15%回報，咁恭喜你，你四十年後將會有一億元！！！呀！咪住，仲有一樣野，就係你今日要立即行動！

道理係簡單，仲係一定可以做到，但係，又係一個問題..有冇人會跟住做呢？據歷史顯示，一萬個人入面， 都未必有一個跟住去做，但跟住做果個咪係億萬富翁囉(就算唔係都係千萬富翁)…如是者，問題唔係做唔做到，而係有冇人跟住做。

有人會話，要每個月剩低三千二蚊，冇可能！

咁，請問呢位先生每個月要洗幾錢呢？八千？ok，咁請問你每個月收入幾多呢？九千？咁的確係剩唔到三千二蚊喎，不過，問題係九千蚊一個月實在太少， 應該考慮自我增值，進修下，學下點搵工，點interview，點bid 高d 價，要加到萬二蚊一個月唔係太難。如是者咪可以每個月剩三千二蚊囉！又多一個億萬富翁！

有人會話，我讀完大學，又有好多專業資格，每個月搵二萬幾，不過都剩唔到三千二蚊，咁又點呢？好，呢位小姐，既然你咁高學歷咁高收入都剩唔到錢，咁 應該係你o既消費模式問題，有d人的確係唔覺唔覺洗晒d 錢，咁你其實可以參加d 儲蓄計劃，由銀行自動轉賬果三千二蚊去投資戶口，咁淨返果d 錢你繼續洗晒佢都得，咁你又可以成為億萬富翁。

又有人會話，我而家都四十幾歲，邊度仲有四十年比我儲蓄？其實，唔同年齡有唔同數字，如果己經四十歲，仲有廿五年就退休，咁其實用三千二蚊去儲，都儲到成千幾萬，做唔成億萬富翁，做個千萬富翁都唔差呀！總好過一味話做唔到，最後要靠生果金生活。

又或者，其實到四十歲，收入自然會比二十出頭o既高，如果到其時有返一百萬係手，咁用埋呢筆錢去投資，之後每個月只要儲一萬七千幾蚊，二十五年後都可以做個億萬富翁。

除此之外，好多人都會話15%回報好難做到，或者有人話一兩年就得，要四十年都有15%回報，冇可能！

其實，會問呢個問題o既人主要係放錢係銀行果d 人，的確，要你放錢係銀行而有15%回報真係冇可能，過去歷史的確只係有一兩年有15%利息一年..(或者，個別地區會有..例如而家o既巴西..)。但 係，睇返股票市場，道指過去四十年升幅有13-14%，而恒指過去三十年都有成17-18%一年(計埋股息再投資！)，咁你話，如果你放係股票市場， 15% for 四十年有冇可能呢？如果你買落巴菲特果隻基金度，回報有成21%先！當然，係咪肯定有15%呢？答案係NO，除左死亡同交稅，冇野係肯定既….

其實，做唔做得成億萬富翁要睇天時地利人和，但肯唔肯踏出第一步就由你自己決定。如果你今日開始去行動，你未必可以做到億萬富翁(不過都係有錢佬！)，不過如果你連第一步都未踏出，咁可以肯定你唔係富翁，只係掌握住果20%財富o既80%人。

林少楊講o既係長線成為億萬富翁方法，下次再講之前睇o既另一本書..”一分鐘億萬富翁”，講下點樣短期內成為億萬富翁(雖則自己未做到..)！