晨早流流轉基金

一大早起左身，訓唔返，走左去睇下自己d 基金...

咦，隻匯豐印度跌得好勁，一百八十蚊跌到得返百六，好彩之前止蝕(蝕左15%)轉走左，唔係又蝕多10%。不過由匯豐印度轉入既貝萊德(之前叫美林)新興歐洲基金，都跌左4%，跌穿左100天線，希望頂得住上返去啦，唔係又要止蝕。

另一方面，之前又膽粗粗轉左去隻JF日本度，但表現都係麻麻，跌左3%多d，睇耐d 先再作打算。

再 睇睇其他基金，發現有隻富蘭克林生物科技基金呢一個月表現唔錯，五十天線升穿左一百天線，個價仲keep 住咁升上去，或者可以繼續上。同時又見隻首域中國基金已經由高位回落左成15%，雖然隻施羅德(之前叫寶源)台灣基金都由高位回落左成17%，不過諗諗下 都係睇好台灣，睇淡中國，於是就轉走中國，轉過去隻生物科技度。老實講，呢隻生物科技表現唔係話太好，風險高(19%)回報低(10%)，升跌月份一半 半，都係睇返兩個月目標15%就夠，唔能夠太貪。

講返隻台灣基金，真係比佢激死，上年12月買入，一路冇乜升跌(其實係跌左少少)，到三 月馬英九當選時一下升左10%，之後又水靜河飛，到六月果時竟然又一個月打回原形，而家輕微蝕3%，怪只怪自己貪心，四五月果陣升左15%放左佢咪好囉！ 不過，又證實左我一直相信既「基金廣告論」又一次正確。

ps. 「報紙廣告論」係指當你係各大報章雜誌巴士地鐵既廣告度見到係同一時間有好多同一種類既新基金推出，咁短期(2-3個月)內呢一個類別既基金表現都麻麻，未必一定會跌，但一定唔好指意佢會勁升。